ఆంధ్రప్రదేశ్ ఉప ముఖ్యమంత్రి, జనసేన పార్టీ అధ్యక్షుడు పవన్ కల్యాణ్ ఆరోగ్యంపై ఆందోళన వ్యక్తమవుతోంది. ముంబైలోని ప్రముఖ కోకిలాబెన్ ధీరూభాయ్ అంబానీ ఆసుపత్రిలో వైద్య పరీక్షలు చేయించుకున్న అనంతరం, ఆయన భుజానికి శస్త్రచికిత్స అవసరమని వైద్యులు సూచించినట్లు సమాచారం. భుజంలోని రొటేటర్ కఫ్తో పాటు మరో రెండు కండరాల్లో తీవ్ర గాయాలు ఉన్నట్లు పరీక్షల్లో తేలడంతో వీలైనంత త్వరగా ఆపరేషన్ చేయాలని వైద్యులు సూచించారు.పవన్ కల్యాణ్ తన సతీమణి అన్నా లెజినోవాతో కలిసి ముంబై వెళ్లి వైద్యులను సంప్రదించారు. గత కొంతకాలంగా భుజం, నడుము నొప్పులతో ఇబ్బంది పడుతున్న ఆయనకు పూర్తి స్థాయి వైద్య పరీక్షలు నిర్వహించిన అనంతరం ఈ నిర్ణయానికి వచ్చినట్లు తెలుస్తోంది. ప్రస్తుతం ఆయన ఆరోగ్య పరిస్థితి స్థిరంగా ఉందని, శస్త్రచికిత్స తేదీపై త్వరలో నిర్ణయం తీసుకునే అవకాశం ఉందని సమాచారం.ఈ నేపథ్యంలో ప్రముఖ నిర్మాత బండ్ల గణేశ్ సోషల్ మీడియా వేదికగా చేసిన భావోద్వేగ పోస్టు వైరల్గా మారింది. పవన్ కల్యాణ్కు ప్రస్తుతం చికిత్స అవసరమైన గాయాలు దాదాపు 15 ఏళ్ల క్రితం ‘గబ్బర్ సింగ్’ సినిమా షూటింగ్ సమయంలో జరిగిన ప్రమాదంలో తగిలినవేనని ఆయన వెల్లడించారు.గుజరాత్లో జరిగిన షూటింగ్ సందర్భంగా గుర్రంపై నుంచి పవన్ కల్యాణ్ కిందపడటంతో భుజానికి తీవ్ర గాయం అయిందని బండ్ల గణేశ్ గుర్తు చేశారు. ఆ సమయంలో వైద్యులు వెంటనే శస్త్రచికిత్స చేయించుకోవాలని సూచించినప్పటికీ, సినిమా నిర్మాణం ఆగిపోకుండా, నిర్మాతకు నష్టం కలగకూడదనే ఉద్దేశంతో పవన్ ఆపరేషన్ను వాయిదా వేసి షూటింగ్ పూర్తి చేశారని తెలిపారు.
తన పోస్టులో బండ్ల గణేశ్ పవన్ కల్యాణ్ త్యాగాన్ని ప్రశంసిస్తూ, “ఒక హీరోగా కాదు… మాటకు కట్టుబడి ఉండే మహామనిషిగా వ్యవహరించారు” అని పేర్కొన్నారు. వందలాది మంది కార్మికులు, సాంకేతిక నిపుణుల శ్రమ వృథా కాకూడదనే ఆలోచనతో తీవ్రమైన నొప్పిని భరిస్తూ సినిమా పూర్తి చేశారని తెలిపారు.”ఆ రోజున మీరు నాకు ఒక హిట్ సినిమా మాత్రమే ఇవ్వలేదు.. జీవితాంతం మర్చిపోలేని ఋణాన్ని ఇచ్చారు. మీ ఆరోగ్యం గురించి ఇప్పుడు ఆలోచిస్తుంటే హృదయం బరువెక్కుతోంది. ఇకపై మీ జీవితంలో ఆరోగ్యం, ఆనందం, ప్రశాంతత మాత్రమే ఉండాలని దేవుడిని ప్రార్థిస్తున్నాను. తెరపైనే కాదు.. నిజ జీవితంలో కూడా మీరు నిజమైన హీరో” అంటూ బండ్ల గణేశ్ తన పోస్టులో భావోద్వేగానికి గురయ్యారు.ఈ పోస్టు సోషల్ మీడియాలో వైరల్గా మారగా, అభిమానులు పవన్ కల్యాణ్ త్వరగా కోలుకోవాలని ఆకాంక్షిస్తూ పెద్ద ఎత్తున సందేశాలు పోస్టు చేస్తున్నారు. రాజకీయ, సినీ ప్రముఖులు కూడా ఆయన ఆరోగ్యం పట్ల ఆందోళన వ్యక్తం చేస్తూ త్వరగా కోలుకోవాలని ఆకాంక్షిస్తున్నారు.
