తిరుమల శ్రీవారి దర్శనానికి వచ్చిన భక్తులు టీటీడీ సిబ్బంది చేసిన చిన్న పొరపాటు కారణంగా కొంతసేపు ఇబ్బందులు ఎదుర్కొన్నారు. శ్రీవాణి ట్రస్ట్ దర్శన టికెట్లపై దర్శన సమయం తప్పుగా ముద్రించడంతో సుమారు 300 మంది భక్తులు గందరగోళానికి గురయ్యారు. అయితే టీటీడీ ఉన్నతాధికారులు వెంటనే స్పందించి ప్రత్యేక ఏర్పాట్లు చేయడంతో భక్తులకు ఊరట లభించింది.వివరాల్లోకి వెళితే.. శ్రీవారి దర్శనం కోసం పలువురు భక్తులు మూడు నెలల ముందుగానే ఆన్‌లైన్ ద్వారా శ్రీవాణి ట్రస్ట్ దర్శన టికెట్లను బుక్ చేసుకున్నారు. అయితే ఆ టికెట్లపై దర్శన సమయం సాయంత్రం 4 గంటలకు బదులుగా పొరపాటున తెల్లవారుజామున 4 గంటలుగా ముద్రితమైంది. టికెట్‌పై ఉన్న సమయాన్ని నమ్మిన దాదాపు 300 మంది భక్తులు తెల్లవారుజామున 3 గంటలకే తిరుమలలోని వైకుంఠం క్యూ కాంప్లెక్స్-1 వద్దకు చేరుకున్నారు.దర్శనం కోసం వచ్చిన భక్తుల టికెట్లను టీటీడీ సిబ్బంది పరిశీలించగా సమయం తప్పుగా నమోదైన విషయం బయటపడింది. వాస్తవానికి సాయంత్రం జరగాల్సిన దర్శనానికి ఉదయం సమయం చూపించడంతో భక్తులు ఆందోళనకు గురయ్యారు. దీంతో కొంతసేపు అక్కడ గందరగోళ పరిస్థితి ఏర్పడింది.ఈ విషయం టీటీడీ ఉన్నతాధికారుల దృష్టికి వెళ్లడంతో వారు వెంటనే స్పందించారు. శ్రీవాణి ట్రస్ట్ దాతల విభాగంలో జరిగిన పొరపాటు వల్ల ఈ సమస్య ఏర్పడిందని గుర్తించారు. తప్పును ముందుగానే గుర్తించి కొంతమంది భక్తులకు సరైన సమయాన్ని తెలియజేసినప్పటికీ, సమాచారం అందని భక్తులు ఇబ్బంది పడ్డారని అధికారులు తెలిపారు.భక్తులకు ఎలాంటి అసౌకర్యం కలగకుండా టీటీడీ వెంటనే ప్రత్యామ్నాయ చర్యలు చేపట్టింది. ఇబ్బంది పడిన భక్తులందరికీ రెఫరల్ ప్రొటోకాల్ వీఐపీ బ్రేక్ దర్శనం ద్వారా శ్రీవారి దర్శనం కల్పించారు. దీంతో భక్తులు స్వామివారిని దర్శించుకుని సంతృప్తి వ్యక్తం చేశారు.టికెట్ల జారీలో జరిగిన సాంకేతిక పొరపాటు తాత్కాలికంగా ఇబ్బందులు కలిగించినప్పటికీ, టీటీడీ వేగంగా స్పందించి సమస్యను పరిష్కరించింది. భవిష్యత్తులో ఇలాంటి పొరపాట్లు జరగకుండా మరింత జాగ్రత్తలు తీసుకోవాల్సిన అవసరం ఉందని అధికారులు భావిస్తున్నారు.