ఆంధ్రప్రదేశ్లోని విశాఖపట్నంలో ఉన్న కేంద్రీయ గిరిజన విశ్వవిద్యాలయం (సెంట్రల్ ట్రైబల్ యూనివర్సిటీ) తొలి స్నాతకోత్సవం మంగళవారం ఘనంగా నిర్వహించారు. ఈ చారిత్రాత్మక కార్యక్రమానికి భారత రాష్ట్రపతి ద్రౌపది ముర్ము ముఖ్య అతిథిగా హాజరై విద్యార్థులకు పట్టాలు ప్రదానం చేశారు. విశ్వవిద్యాలయం ప్రారంభమైన తర్వాత నిర్వహించిన తొలి కాన్వొకేషన్ కావడంతో ఈ కార్యక్రమానికి ప్రత్యేక ప్రాధాన్యత ఏర్పడింది.
స్నాతకోత్సవంలో మొత్తం 373 మంది డిగ్రీ, పీజీ విద్యార్థులు పట్టాలు అందుకున్నారు. చదువులో అత్యుత్తమ ప్రతిభ కనబరిచిన 13 మంది విద్యార్థులకు రాష్ట్రపతి ద్రౌపది ముర్ము స్వర్ణ పతకాలను ప్రదానం చేసి అభినందించారు. విద్యార్థులు విద్యతో పాటు సమాజ సేవ, నాయకత్వ లక్షణాలను పెంపొందించుకోవాలని ఆమె ఆకాంక్షించారు.
ఈ కార్యక్రమంలో రాష్ట్రపతితో పాటు ఆంధ్రప్రదేశ్ గవర్నర్ అబ్దుల్ నజీర్, కేంద్ర విద్యాశాఖ మంత్రి ధర్మేంద్ర ప్రధాన్, రాష్ట్ర మంత్రులు నారా లోకేశ్, వంగలపూడి అనిత, గుమ్మడి సంధ్యారాణి పాల్గొన్నారు. విశ్వవిద్యాలయం వైస్ ఛాన్సలర్ కట్టమణి, రిజిస్ట్రార్ జితేంద్ర మోహన్తో పాటు అధ్యాపకులు, విద్యార్థులు, అధికారులు పెద్ద సంఖ్యలో హాజరయ్యారు.
అంతకుముందు విశాఖపట్నం విమానాశ్రయానికి చేరుకున్న రాష్ట్రపతి ద్రౌపది ముర్ముకు ఘన స్వాగతం లభించింది. గవర్నర్ అబ్దుల్ నజీర్తో కలిసి ఆంధ్రప్రదేశ్ అసెంబ్లీ స్పీకర్ అయ్యన్నపాత్రుడు, రాష్ట్ర మంత్రులు నారా లోకేశ్, వంగలపూడి అనిత రాష్ట్రపతికి పుష్పగుచ్ఛాలు అందించి స్వాగతం పలికారు. భద్రతా ఏర్పాట్ల మధ్య రాష్ట్రపతి కాన్వొకేషన్ వేదికకు చేరుకున్నారు.
ఈ సందర్భంగా రాష్ట్ర మంత్రి నారా లోకేశ్ సోషల్ మీడియా వేదికగా స్పందించారు. రాష్ట్రపతి ద్రౌపది ముర్ముకు విశాఖపట్నంలో స్వాగతం పలకడం తనకు గౌరవంగా భావిస్తున్నానని పేర్కొన్నారు. “ఆంధ్రప్రదేశ్కు విచ్చేసిన రాష్ట్రపతి ద్రౌపది ముర్ము గారికి హృదయపూర్వక స్వాగతం” అంటూ ఆయన ట్వీట్ చేశారు.
విశాఖపట్నంలోని కేంద్రీయ గిరిజన విశ్వవిద్యాలయం గిరిజన విద్యార్థులకు ఉన్నత విద్యను అందించేందుకు కేంద్ర ప్రభుత్వం ఏర్పాటు చేసిన ప్రతిష్ఠాత్మక విద్యాసంస్థ. తొలి స్నాతకోత్సవంలో రాష్ట్రపతి స్వయంగా పాల్గొని పట్టాలు ప్రదానం చేయడం విశ్వవిద్యాలయానికి మరింత గుర్తింపు తీసుకొచ్చింది. ఈ కార్యక్రమం విద్యార్థులకు జీవితాంతం గుర్తుండిపోయే మధుర అనుభూతిగా నిలిచింది.
